އަހަރުގެ ފުރަތަމަ 70 ދުވަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދެ ލައްކައަށް ވުރެ މައްޗަށް އަރައިފިއެވެ. ޓޫރިޒަމް މިނިސްޓްރީން ހަފްތާއަކު އެއްފަހަރު ނެރޭ، "މޯލްޑިވްސް ޓޫރިޒަމް އަޕްޑޭޓް" ރިޕޯޓްގައި ވާގޮތުން އަހަރުގެ ޖެނުއަރީ ފެށިގެން މިމަހުގެ 11 ވަނަދުވަހުގެ ނިޔަލަށް ރާއްޖެއަށްް ޒިޔާރަތްކުރީ 220840 ފަތުރުވެރިންނެވެ.
ޓޫރިޒަމް މިނިސްޓްރީން ވިދާޅުވީ ރާއްޖެއަށް އެންމެ ގިނަ އަދަދަކަށް ފަތުރުވެރިން މިހާރު އަންނަނީ އިންޑިއާއިން ކަމަށެވެ. އެގޮތުން މިމަހުގެ 11ވަނަ ދުވަހުގެ ނިޔަލަށް އިންޑިއާއިން ރާއްޖެއަށް 52201 ފަތުރުވެރިން އައިސްފައިވާ ކަމަށް ޓޫރިޒަމް މިނިސްޓްރީގެ ހިސާބުތަކުން ދައްކައެވެ.
އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެފައިވަނީ ދެ ޤައުމު ދެމެދު ޤާއިމްކޮށްފައިވާ "އެއަރ ޓްރެވެލް ބަބުލް" ގެ ސަބަބުންނެވެ. އެއަރ ބަބުލްއާއެކު ބައެއް އެއަރލައިންތަކުން ދަނީ ރާއްޖެއާއި އިންޑިއާއާއި ދެމެދު ސީދާ ދަތުރުތައް ކުރަމުންނެވެ. ދަތުރުތައް ބާއްވަމުންދާ އެއަރލައިންތަކުގެތެރޭގައި އެއަރ އިންޑިއާ، އިންޑިގޯ، ގޯ އެއަރ އަދި ސްޕައިސްޖެޓް ހިމެނެއެވެ. އަދި ދާދިފަހުން އިންޑިއާގެ ވިސްތާރާ އެއަރލައިންވެސް ވަނީ ރާއްޖެއަށް ދަތުރުތައް ފަށާފައެވެ.
2018 ވަނަ އަހަރު ނިމުނު އިރު އިންޑިއާ އަކީ ފަސްވަނައަށް ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމެވެ.
އެހެން ނަމަވެސް މިދިޔަ އަހަރު ނިމުނު އިރު އެންމެ ގިނަ އަދަދަކަށް ރާއްޖެއަށް ފަތުރުވެރިން ޒިޔާރަތްކޮށްފައިވަނީ އިންޑިއާއިންނެވެ. އެގޮތުން މިދިޔަ އަހަރު އިންޑިއާއިން ރާއްޖެއަށްވަނީ ރާއްޖެއަށް 62905 ފަތުރުވެރިން ޒިޔާރަތްކޮށްފައެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ދެވަނަ އަށް އެންމެ ގިނަ އަދަދަކަށް ފަތުރުވެރިން ރާއްޖެއަށް އަންނަނީ ރަޝިއާއިންނެވެ. އަހަރުގެ ފުރަތަމަ 70 ދުވަސްތެރޭ ރަޝިއާއިން ރާއްޖެއަށްވަނީ 47680 ފަތުރުވެރިން އައިސްފައެވެ. އަދި ތިންވަނަ އަށް އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ ޔޫކްރެއިން އިންނެވެ. މި މުއްދަތުގައި ޔޫކްރެއިނުން ރާއްޖެއަށްވަނީ 14553 ފަތުރުވެރިން އައިސްފައެވެ.